Контакт
contact@kb.com.mk

контакт центар:
(02) 3 296 800

Н О В О С Т И



04.04.2018 - Соопштение


Денес, 04.04.2018 година, акционерите на Комерцијална банка АД Скопје го одржаа своето редовно Годишно собрание.

 

Акционерите потврдија дека Банката ја заврши 2017 година со бруто-добивка во износ од 912,4 милиони денари. По пресметување на данокот на добивка од 91,9 милиони денари, нето-добивката на Банката изнесува 820,5 милиони денари. Акционерите на Банката донесоа Одлука за употреба и распоредување на нераспределената добивка во износ од 820,5 милиони денари и ја утврдија дивидендата за обичните акции во висина од 18% од номиналната вредност на акцијата, односно по 180 денари на една акција. Заради зголемување на вкупниот капитал на Банката и на книговодствената вредност на акциите на Банката, акционерите одлучија дел од добивката, во износ од 410,3 милиони денари, да се издвои во резерви.

 

На Собранието беа усвоени финансиските извештаи и консолидираните финансиски извештаи, како и Годишната сметка на Банката и Консолидираната годишна сметка на Банката за 2017 година, беше избрано друштво за ревизија и усвоен Извештајот за усогласеноста на работењето на Банката со Кодексот за корпоративно управување на акционерските друштва котирани на Македонската берза.

 

 

 

 

ДИРЕКЦИЈА ЗА УПРАВУВАЊЕ

 

И ИНФОРМИРАЊЕ






13.4.2018 - Комерцијална банка спонзор на Камерниот оркестар „Скопски солисти“


Комерцијална банка АД Скопје е спонзор на Камерниот оркестар „Скопски солисти“ на концертот кој ќе се одржи по повод Велигденските празници, насловен како „Празничен концерт“.

На овој концерт, покрај Камерниот оркестар „Скопски солисти“, ќе земат учество и познатиот и светски наградуван хор „Св. Злата Мегленска“, а под диригентската палка на познатиот бугарски диригент Андреј Андреев.

Концертот ќе се одржи во Македонската филхармонија на 14.4.2018 година.




12.04.2018 - Известување


Комерцијална банка АД Скопје објавува дека на 11.04.2018 година Маргот Џејкобс поднесе оставка од член на Надзорниот одбор на Банката, од причина што East Capital Explorer Investments AB не е повеќе акционер во Банката.




05.04.2018 - СООПШТЕНИЕ


Комерцијална банка АД Скопје ги известува своите акционери дека почнувајќи од 30 април 2018 година ќе врши исплата на дивиденда за 2017 година

 

Право на исплата на дивиденда за 2017 година имаат сите акционери на Комерцијална банка АД Скопје кои се евидентирани во книгата на акции на  19 април 2018 година.

 

Исплатата на дивиденда за 2017 година на правните лица ќе се врши со пренос на средствата на нивните сметки во Банката или во друга банка.

 

За исплатата на дивиденда за физички лица, плаќањето на ПДД ќе се врши со електронска пресметка за приход и данок (е-ППД) до УЈП, согласно Законот за измени и дополнувања на Законот за персонален данок (Службен весник бр. 190/2017). Заради потребата од целосни податоци за внес во е-ППД системот, се повикуваат сите акционери кои не се внесени во евиденцијата на УЈП како даночни обврзници, да преземат соодветни мерки за нивно евидентирање во даночната евиденција на  УЈП. Ова особено се однесува на малолетните лица и/или други лица кои досега не биле приматели на оданочив приход од кој било вид во Република Македонија. 

 

На физичките лица средствата од дивидендата за 2017 година ќе им бидат уплатени на нивните сметки во Комерцијална банка АД Скопје,  освен за лицата кои имаат дадено овластување за пренос на дивидендата на сметка во друга банка. Комерцијална банка АД Скопје во таков случај средствата од дивидендата за 2017 година ќе ги уплати на назначената сметка.

 

Физичките лица кои немаат сметка во Комерцијална банка АД Скопје или не дале овластување, ќе треба за исплата на дивиденда за 2017 година да отворат сметка во Банката или да дадат овластување за пренос на дивидендата на сметка во друга банка. Ова можат да го направат во сите филијали и експозитури на Комерцијална банка АД Скопје низ Републиката.

 

Согласно член 77, став 8, од Законот за персонален данок на доход,  пресметката на персонален данок од дивиденди и други приходи остварени со учество во добивката во 2017 година, а исплатена во 2018 година, ќе биде доставена до секој акционер евидентиран во книгата на акции по извршената исплата на дивидендата. Доколку некои од акционерите не го добијат документот поради технички причини (промена на адреса и слично), истиот ќе може да го подигнат во сите филијали и експозитури на Комерцијална банка АД Скопје низ Републиката.

 

Дополнителни информации може да се добијат на телефонските броеви:  3168 311, 3168 310, 3168 312 и 3168 308.

 

Комерцијална банка АД  Скопје




28.03.2018 - ЕБРД ја награди Комерцијална банка со две престижни награди


Комерцијална банка АД Скопје е добитник на две награди од ЕБРД за својата работа и достигнувања во 2017 година.

 

Наградата „Most Active Issuing Bank in 2017 in FYR Macedonia” Банката ја добива по тринаесети пат како најактивна банка во меѓународната трговија (ТФП) во Република Македонија, но оваа година, за прв пат „Deal of the Year” for KB/938 (Зделка на годината за трансакција во која се вклучени две земји и две банки) оди во рацете на професионалниот тим на Комерцијална банка.

 

Конфирмираните трансферабилни акредитиви бараат повисок степен на специфично стручно знаење и експертиза, па затоа оваа награда ЕБРД ја доделува  за прв пат на Комерцијална банка, а се однесува на целиот регион каде дејствува ЕБРД (Европа, Азија и Африка)

 

Со оваа награда Комерцијална банка АД Скопје стана дел од светската мапа на меѓународни трговски експерти.

 

 




22.3.2018 - Признанија за крводарителите од Комерцијална банка


По повод 17 Март - Денот на крводарителите, општинската организација на Црвениот крст – Центар беше наградена од страна на Министерството за здравство, а  Здружението на крводарители при Комерцијална банка АД Скопје – „Капка за живот“, како најактивна организација во Општина Центар доби плакета како признание. Јубилејни признанија добија и неколку крводарители, како Александар Пеев од Комерцијална банка за покажаната хуманост и солидарност и 25 дарувања на крв.

 

Дарувањето крв е една од најзначајните општествено одговорни активности со која спасуваме животи. Да им е честит денот 17 Март на сите крводарители.

 

Slika_krv



22.03.2018 - Известување од Комерцијална банка АД Скопје


Комерцијална банка АД Скопје ја известува јавноста дека на 21.03.2018 година во блок-трансакција беа истргувани вкупно 298.003 акции издадени од Комерцијална банка АД Скопје, по цена од 3.750 денари по акција, во вкупна вредност од 1.117.511.250 денари.

 

Досегашниот акционер со квалификувано учество East Capital Explorer Investments AB и неговото поврзано лице Salink Limited изврши продажба на сите акции што ги поседуваше во Банката, односно 298.003 акции, што претставува 13,076% учество во вкупниот број акции издадени од Комерцијална банка АД Скопје.

 

Како купувачи на продадените акции се јавуваат следните правни лица:

 

Адора Инженеринг ДООЕЛ Експорт Импорт

Гранит АД Скопје

ИГМ-Трејд Илија ДОО

Индустри Сервис ДОО Скопје

 

Дополнително, известуваме дека секое од правните лица поединечно не го надминува прагот од 5% акционерско учество во вкупниот капитал на Банката.




22.03.2018 - Уште две блок-трансакции со акциите на Комерцијална банка


Комерцијална банка АД Скопје ја известува јавноста дека на 22.03.2018 година во две блок-трансакции беа истргувани вкупно 164.332 акции издадени од Комерцијална банка АД Скопје, по цена од 3.750 денари по акција, во вкупна вредност од 616.245.000 денари.

 

На продажната страна на трансакциите се јавуваат странски инвестициски фондови и нивните клиенти, додека на куповната страна се јавуваат две физички лица и следните правни лица:

 

Макпетрол АД Скопје

Индустри Сервис ДОО Скопје

М.Г. Фешн ДОО Увоз-Извоз Скопје

ЛЕАН ДОО Скопје

ЗСФ-КОМ ДООЕЛ Увоз-Извоз Скопје

ИНТ Трејд ДООЕЛ Кочани

 

Дополнително, известуваме дека секој од купувачите поединечно не го надминува прагот од 5% акционерско учество во вкупниот капитал на Банката.




20.03.2018 - Кампања на Комерцијална банка и Веро


Во периодот од 15 март до 15 јуни 2018 година ќе биде реализирана заедничка кампања на Комерцијална банка и Веро маркетите.

Кампањата се однесува на сите постојни и идни корисници на Mastercard® платежните картички на Комерцијална банка кои со секоја направена трансакција во Веро маркетите со Mastercard® картичките на Банката ќе добијат поврат на средства во износ од 3% од трансакцијата.

Вкупниот поврат на средства од тековниот месец ќе биде префрлен на сметката на картичката на 10 наредниот месец.







А Р Х И В А