Контакт
contact@kb.com.mk

контакт центар:
(02) 3 296 800

СПОНЗОРСТВА И ДОНАЦИИ


Комерцијална банка како водечка банка во Република Македонија активно е вклучена во развојот и благосостојбата на нацијата, луѓето и здравата и чиста животна средина преку поддржувањето на широк спектар на организации, активности и настани, а со цел да се промовираат и прослават успехот, иновациите, напредокот во следниве области:

  • Спорт;     
  • Уметност;     
  • Научно-истражувачка и издавачка дејност и конференции;     
  • Општествени/социјални;     
  • Медиуми;     
  • Простории;     
  • Доколку сакате да аплицирате за спонзорство пополнете го следното барање за спонзорство.


2018


Спонзор на Фестивалот „За Петровден сите на планина“

 

Комерцијална банка АД Скопје е спонзор на единаесеттиот Меѓународниот етно фестивал на изворни влашки песни насловен „За Петровден сите на планина“ кој се одржа на планината Пониква крај Кочани за време на верскиот празник Петровден а во организација на влашката пејачка група „Грамостеањ“ од Скопје. На овој фестивал земаа учество повеќе од 80 пејачи (солисти и пејачки групи) од Република Македонија, како и од повеќе земји на регионот.


Спонзор на Фестивалот „Македонско културно лето“ 2018

 

Комерцијална банка АД Скопје трета година по ред е спонзор на Фестивалот „Македонско културно лето 2018“ кој оваа година по единаесетти пат се одржа во Преспа во организација на Здружението на Македонците по потекло од Албанија „Сонце“ Скопје .

Покрај промовирањето и афирмацијата на македонската култура во Република Македонија, главната цел на овој фестивал е поголема свест, грижа и негување на македонската култура, јазик и традиција, како од поединците така и од локалните и државните институции во Република Абанија, како и претставување на дел од културата на нашата држава кај македонските и албанските граѓани во Албанија, а истиот ќе послужи како пример за развојот и негувањето на културата, јазикот и традицијата кај тамошниот македонски народ.


Спонзор на манифестацијата „Галичка свадба“

   

Комерцијална банка АД Скопје и оваа година е спонзор на манифестацијата „Галичка свадба“ која традиционално се одржува околу верскиот празник Петровден. Оваа година, во периодот од 13 до 15 јули, Галичник беше широко отворен за сите што одблиску сакаа да ја запознаат неговата  живописност, како и дел од волшепството на изворното македонско културно наследство.

Особеноста на народните обреди и обичаи, свадбените песни и ора, во неделива хармонија со раскошните носии и неповторливиот галички амбиент, овозможуваат оваа манифестација да се доживува во својата единственост и неповторливост. Тоа налага нејзино континуирано негување и презентирање, како нешто драгоцено и свето што исконски го изразува нашето паметење и постоење.

Инаку, културната манифестација „Галичка свадба“ оваа година од Њујорк Тајмс е вброена меѓу деветте европски фестивали кои мора да се посетат, а Нешенал Џеографик ја прогласи за манифестација со најтрадиционални свадбени обичаи во Европа.


Спонзор на „Илинденски марш 1978“

 

Комерцијална банка АД Скопје е спонзор на Здружението на граѓани „Илинденски марш 1978“ Скопје, кое по повод големиот национален македонски празник 2 Август - Илинден и 40 години од првиот Илинденски марш, во соработка со манифестацијата „10 дена Крушевска Република“ по дваесетти пат го организира познатиот традиционален Илинденски коњанички марш од Скопје до славното Крушево.


Спонзор на Здружението „Вичо“

 

Банката и оваа година е спонзор на активностите на Здружението „Вичо“, кое е организатор на традиционалната манифестација чија основна цел е афирмација, заштита и борба за потврдување на самобитноста на македонскиот народ и неговиот социо-културен идентитет.

Оваа средба традиционално се одржа по 38-ми пат на 2.8.2018 година во потпелистерското село Трново – храмот на Света Богородица.


БАНКАТА ГЕНЕРАЛЕН ПОКРОВИТЕЛ НА ФЕСТИВАЛОТ „ONE LOVE TOUR 2018“

 

Комерцијална банка АД Скопје ја има честа да биде  Генерален покровител на второто издание на Фестивалот насловен ЕДНА ЉУБОВ преку границите на Македонија и Бугарија. Најдоброто од двете држави за сите генерации!

Во Градскиот парк на големата полјана (зад Езерце) на 16.6.2018 година (сабота) ќе се одвива целодневна презентација на најкарактеристичното од културата, уметноста, музиката и кулинарските традиции меѓу Македонија и Бугарија, а во културно-уметничката програма учество ќе земат Златните славејчиња, групата „Љубојна“, Ансамбл Булгаре, Деси Добрева, Сашко Коцев, Фолтин, Оратница, Графа, Next Time и групата „Слаткаристика“.

Фестивалот ќе започне во 10:00 часот, а влезот е слободен.

Следејќи ја својата определба за општествена одговорност, Комерцијална банка АД Скопје и овој пат со задоволство застана во поддршка на вистинските уметнички вредности кои го збогатуваат нашиот културен живот.


Спонзор на манифестацијата „Поетска ноќ во Велестово”

 

Со цел да се промовира културата во руралните средини, а наедно и да се промовира културата надвор од македонските граници, се организира меѓународната манифестација насловена „Поетска ноќ во Велестово“ која оваа година ќе се одржи по 30-ти пат во Домот на културата во с. Велестово. Традиционално, и оваа година Банката ги спонзорира активностите на манифестацијата „Поетска ноќ во Велестово“ која ќе трае два дена и на неа ќе се претстават поети, сликари и музичари како од Република Македонија така и од повеќе земји во светот.


Спонзор на Сојуз на борците од НОАВМ 1941-1945 и граѓаните продолжувачи

 

Банката и оваа година финансиски ги поддржа планираните активности на Сојузот на борците од НОАВМ и граѓаните продолжувачи во одбележување на историски датуми поврзани со  одбележувањето на 75 години од загинувањето на народните херои Кузман Јосифовски Питу, Раде Јовчевски Корчагин, Цветан Димов и други, како и други многубројни одбележувања на значајни личности и настани, поврзани со формирањето на народната власт.


Комерцијална банка Спонзор на „Малиот битолски Монмартр 2018“

 

Банката и оваа година традиционално ќе ги поддржи младите со спонзорирање на 37-миот по ред детски ликовен фестивал „Мал битолски Монмартр 2018“, кој и оваа година ќе се одржи во Битола во периодот од 23 до 30 мај 2018 година.

На овој фестивал учениците ќе творат на традиционалната тема „Старата македонска архитектура“ во Битола и на  ликовните каравани во Охрид и во Крушево.

Детскиот ликовен фестивал „Мал битолски Монмартр“ претставува светска културно-образовна манифестација која го развива детското ликовно творештво преку учество на млади ликовни таленти од сите меридијани и дава непроценлив придонес за афирмација на Република Македонија


Банката спонзор на Детскиот театар „Бабец“ од Битола

 

Банката, како општествено одговорна компанија која го следи развојот на младите поколенија, осма година по ред ги поддржа активностите на Детскиот театар „Бабец“ од Битола, за реализација на театарската претстава „Бременските музиканти“ работена според истоимената бајка на браќата Грим во режија на Васко Мавровски.

Основна цел на постоењето на „Бабец“ е да ги запознае децата со театарот и со културата воопшто, а со тоа да придонесе кон изградба на едуцирана публика која ќе претставува стожер на новиот модерен македонски театар. Следејќи ги овие определби, оваа институција и годинава ќе продолжи со настојувањата преку театар, песна, балет и социјализација да ги оттргне децата од улицата и да ги запознае со убавините на културата.Бројните театарски проекти на „Бабец“ продолжуваат да бележат успеси, како на домашната така и на меѓународната детска театарска сцена, а Комерцијална банка АД Скопје е особено горда што и понатаму ќе биде дел од таа успешна приказна.


Банката спонзор на Македонската берза на хартии од вредност АД Скопје

 

Комерцијална банка е спонзор на 19-та Конференција на Берзата која претставува централно место за размена на искуства и промоција на идеи за понатамошен развој на пазарот на хартии од вредност во Република Македонија. Конференцијата се одржа на 4 мај 2018 година во Охрид.

На Конференцијата беа поканети еминентни домашни и меѓународни експерти кои се обратија на голем број присутни претставници на бизнис секторот, банки, брокерски куќи, фондовската индустрија, котирани компании и други акционерски друштва, универзитети и државни институции.


Спонзор на настанот „Денови на кариера 2018“ (Саем за таленти)

 

Комерцијална банка АД Скопје како традиционален партнер во соработка со Економскиот факултет – Скопје и оваа година со своето учество му даде посебен печат на настанот „Денови на кариера 2018“ (Саем за таленти), заложувајќи се за поврзување на студентите и факултетите со бизнис заедницата. Настанот во заедничка организација на Економскиот Факултет - Скопје и Интернационалната студентска организација АИСЕК „Денови на кариера 2018“, кој оваа година беше со малку изменет концепт и ново име – Саем за таленти – Pitch Please – Испробај се!, се одржа на 11.05.2018 година.


Комерцијална банка Спонзор на Фестивалот „Прозорец кон италијанската кинематографија“

 

Амбасадата на Република Италија во Република Македонија повеќе години наназад организира серија на културни настани чија основна цел е италијанската култура и уметност што повеќе да ја доближи до македонските граѓани.

Комерцијална банка АД Скопје е спонзор на Италијанскиот филмски фестивал насловен „Прозорец кон италијанската кинематографија“ кој ќе се одржи во периодот од 17 до 23 мај во Кинотеката на Македонија. Од вкупно седум филмови, првиот филм ќе биде прикажан во кино „Милениум“.


Комерцијална банка спонзор на Камерниот оркестар „Скопски солисти“


Комерцијална банка АД Скопје е спонзор на Камерниот оркестар „Скопски солисти“ на концертот кој ќе се одржи по повод Велигденските празници, насловен како „Празничен концерт“.

На овој концерт, покрај Камерниот оркестар „Скопски солисти“, ќе земат учество и познатиот и светски наградуван хор „Св. Злата Мегленска“, а под диригентската палка на познатиот бугарски диригент Андреј Андреев.

Концертот ќе се одржи во Македонската филхармонија на 14.4.2018 година.


Комерцијална банка, Генерален покровител на наградата „Роман на годината“ за 2017 година


Банката е Генерален покровител на наградата „Роман на годината“ за 2017 година, која се доделува петнаесет години по ред, а која оваа година ја додели Фондацијата за промоција и унапредување на културните вредности „Славко Јаневски“.

 

Жирито во состав: Давор Стојановски, Ристо Лазаров, Иван Додовски, Анета Дучевска и Катерина Богоева, го избра романот „Одбројување“ од Фросина Пармаковска за „Роман на годината“ за 2017 година.

 

„Одбројување“ е трет роман на Фросина Пармаковска, која е авторка и на романите „Пишувајќи ги изгубените топки“ и „Вишнова хроника“.
 
Роман на годината

Банката, Генерален спонзор на концертите на Влатко Стефановски


Комерцијална банка е долгогодишен покровител на многубројни фестивали и културни случувања. Така и во 2018 година продолживме да ја поддржуваме културата и уметноста.

 

Банката е Генерален спонзор на концертите на Влатко Стефановски, кои во организација на Баги Комуникации ќе се одржат на  17,18 и 20 март во Македонската филхармонија а на кои ќе го промовира  неговиот триесет и петти албум наречен „Мајчин јазик“.

 

На концертите публиката ќе може во живо да го слушне материјалот од новиот албум, а како специјални гости ќе бидат балканската етно дива Биља Крстиќ, нашата оперска дива Весна Гиновска Илкова, како и групата Љубојна.
 
Влатко Стефановски Концерт
 

Банката спонзор на проектот на Здружението „Мандра“

Комерцијална банка АД Скопје трета година по ред беше спонзор на деветтиот турнир во мал фудбал кој се одржува по повод роденденот на поп звездата Тоше Проески, а во организација на Здружението на Власи стопанственици од Македонија „Мандра“ од Скопје.

На оваа манифестација, која се одржа на 27 и 28 јануари 2018 година, имаше предвидено и простор за културно-уметничка програма на која земаа учество еминентни пејачи од сите националности.


Комерцијална банка АД Скопје - спонзор на магазинот „Премин“

Комерцијална банка АД Скопје неколку години по ред е спонзор на магазинот „Премин“. Магазинот „Премин“ со своите содржини гради врска меѓу духовното и реалното и ја афирмира македонската културна, историска и црковна мисла. Изборот на текстовите и пораките на овој магазин ја содржи димензијата на православието вон границите на националното и културното и е придружник на секој што се стреми кон лична преобразба.


Продолжена соработката со Црвениот крст на Македонија

Комерцијална банка АД Скопје осум години во континуитет има плодна соработка со Црвениот крст на Република Македонија како Генерален покровител на проектот „Подобра социјализација на децата и младите со посебни потреби“.

Основен мотив за вклучувањето во овој проект е да им овозможиме на децата и младинците со посебни потреби да го развијат здравиот дух и креативниот капацитет, дополнително да се едуцираат и целосно да се интегрираат во нашето општество.

Продолжувањето на соработката со Црвениот крст и поддршката на овој проект ги потврдува нашите напори за долгорочен и систематски пристап кон подобрувањето на благосостојбата на ранливите групи во заедницата и е во согласност со стратегиските заложби на Банката на полето на општествената одговорност.

Сите веруваме во подобра иднина, но да се гледа иднината значи да се прифати одговорноста за она што се случува денес во општеството, да се поттикнат промени, како во нашиот професионален сектор така и во заедницата генерално. Целта на секоја компанија и на секоја индивидуа е да живее во хармонија со себе и со своето опкружување, а за тоа е потребно да се биде одговорен за секоја постапка и одлука, професионална и лична.




А Р Х И В А